ദാറുൽഹുദാ റൂബി ജൂബിലി; 'ഇന്തോ-അറബ് റിലേഷൻസ്' അന്താരാഷ്ട്ര കോൺഫറൻസിന് തുടക്കമായി

തേഞ്ഞിപ്പലം/ തിരൂരങ്ങാടി: ദാറുൽഹുദാ ഇസ്‌ലാമിക സർവകലാശാല നാൽപതാം വാർഷിക റൂബി ജൂബിലിയോട് അനുബന്ധിച്ച് കൈറോയിലെ ലീഗ് ഓഫ് യൂനിവേഴ്സിറ്റീസ്, കാലിക്കറ്റ് സർവകലാശാല എന്നിവരുമായി സഹകരിച്ച് സംഘടിപ്പിക്കുന്ന 'ഇന്തോ-അറബ് റിലേഷൻസ്' അന്താരാഷ്ട്ര കോൺഫറൻസിന് കാലിക്കറ്റ് യൂനിവേഴ്സിറ്റി ഇ.എം.എസ് സെമിനാർ ഹാളിൽ തുടക്കമായി.

ഇന്ത്യയും അറബ് രാജ്യങ്ങളും തമ്മിലുള്ള നൂറ്റാണ്ടുകൾ പഴക്കമുള്ള സാംസ്കാരിക ബന്ധങ്ങളും വിനിമയങ്ങളും ചർച്ച ചെയ്യുന്ന കോൺഫറൻസ് ലീഗ് ഓഫ് ഇസ്‌ലാമിക് യൂനിവേഴ്സിറ്റീസ് ജന. സെക്രട്ടറി പ്രൊഫ. സാമി മുഹമ്മദ് റബീഹ് അശ്ശരീഫ് ഉദ്ഘാടനം ചെയ്തു. കാലിക്കറ്റ് സർവകലാശാല അറബിക് ഡിപ്പാർട്ട്മെൻ്റ് മേധാവി പ്രൊഫ.ടി.എ അബ്ദുൽ മജീദ് അധ്യക്ഷനായി. അലീഗഢ് സർവകലാശാല മലപ്പുറം ഡയറക്ടർ ഡോ. ഫൈസൽ കെ.പി മാരിയാട് ആമുഖ പ്രഭാഷണം നടത്തി. ദാറുൽഹുദാ വൈസ് ചാൻസലർ ഡോ. ബഹാഉദ്ദീൻ മുഹമ്മദ് നദ്‌വി പ്രമേയ പ്രഭാഷണം നിർവഹിച്ചു. കാലിക്കറ്റ് സർവകലാശാല മുൻ വൈസ് ചാൻസലർ ഡോ. കെ.കെ.എൻ കുറുപ്പ് മുഖ്യാതിഥിയായി.

ഡോ. അബ്ദുറഹ്‌മാൻ അരീഫ് അൽ മലാഹിമി ജോർദാൻ,  ഡോ. സ്വാലിഹ് ബിൻ യൂസുഫ് അൽ ജൗദർ ബഹ്റൈൻ, പ്രൊഫ. ഡോ. രിയാദ് ബാസു ലബനാൻ, അബ്ദുൽ ഹക്കീം ഫൈസി ആദൃശ്ശേരി എന്നിവർ വിഷയാവതരണം നടത്തി.

കാലിക്കറ്റ് സർവകലാശാല സിൻഡിക്കേറ്റ് അംഗങ്ങളായ ഡോ. വാസുമതി.ടി, ഡോ. റഷീദ് അഹ്മദ്, സ്കൂൾ ഓഫ് ലാഗ്വേജ് ഡീൻ ഡോ. എ.ബി മൊയ്തീൻ കുട്ടി, പ്രൊഫ. ഡോ. എൻ.എ അബ്ദുൽ ഖാദർ തുടങ്ങിയവർ ആശംസ നേർന്നു.

പ്രൊഫ. ഡോ. അലവി ഈസാ അഹ്‌മദ് അൽ ഖൗലി ഈജിപ്ത്, പ്രൊഫ. ഡോ. മുഹമ്മദ് അബ്ദുല്ല മഗ്‌രിബി ലബനാൻ, വലീദ് അബ്ദുൽ മുൻഇം ഈജിപ്ത്, ഹാതിം സാല അബ്ദുല്ലത്വീഫ് മുഹമ്മദ് അൽറൂമി ഈജിപ്ത്, പ്രൊഫ. ഡോ. മുഹമ്മദ് അലി ഹസ്സൻ സെൻഹൂർ ഈജിപ്ത്, പ്രൊഫ. ഡോ. യു.വി.കെ മുഹമ്മദ്, ഡോ. മുനീർ ജി.പി പങ്കെടുത്തു.

ഇന്നും നാളെയും കൂടി നീണ്ടുനിൽക്കുന്ന കോൺഫറൻസിൽ നിരവധി വിദേശ പ്രതിനിധികളും അക്കാദമിക ഗവേഷകരും വ്യത്യസ്ത വിഷയങ്ങളിൽ പ്രബന്ധമവതരിപ്പിക്കും.

ഇന്തോ-അറബ് അക്കാദമിക സഹകരണങ്ങൾ കൂടുതൽ സുദൃഢമാക്കണം: സാമി അശ്ശരീഫ്

തേഞ്ഞിപ്പലം: ഇന്ത്യയും അറബ് രാജ്യങ്ങളും തമ്മിലുള്ള അക്കാദമിക സഹകരണങ്ങളും ബന്ധങ്ങളും കൂടുതൽ സുദൃഢമാക്കണമെന്ന് ലീഗ് ഓഫ് ഇസ്‌ലാമിക് യൂനിവേഴ്സിറ്റീസ് ജന. സെക്രട്ടറി പ്രൊഫ. സാമി മുഹമ്മദ് റബീഹ് അശ്ശരീഫ്. ദാറുൽഹുദാ ഇസ്‌ലാമിക സർവകലാശാല നാൽപതാം വാർഷിക റൂബി ജൂബിലിയോട് അനുബന്ധിച്ച് കൈറോയിലെ ലീഗ് ഓഫ് യൂനിവേഴ്സിറ്റീസ്, കാലിക്കറ്റ് സർവകലാശാല എന്നിവരുമായി സഹകരിച്ച് സംഘടിപ്പിച്ച 'ഇന്തോ-അറബ് റിലേഷൻസ്' അന്താരാഷ്ട്ര കോൺഫറൻസ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ആഗോള പണ്ഡിത സഭയായ റാബിതതുൽ ആലം ഇസ്‌ലാമിയ അടക്കമുള്ള സംഘടനകൾ അക്കാദമിക രംഗത്ത് കൂടി സജീവമാകണമെന്നും ചരിത്രാതീത കാലം മുതലുള്ള ഇന്തോ-അറബ് ബന്ധങ്ങൾ കൂടുതൽ മേഖലകളിൽ വ്യാപിപ്പിക്കണമെന്നും അദ്ദേഹം പറഞ്ഞു.


ഇന്തോ-അറബ് സംസ്കാരങ്ങൾ അക്കാദമിക രംഗത്ത് ഇന്നും പ്രസക്തമാണ്: ബഹാഉദ്ദീൻ നദ്‌വി

തേഞ്ഞിപ്പലം : ഇന്താേ-അറബ് സംസ്കാരങ്ങൾ അക്കാദമിക രംഗത്ത് ഇന്നും പ്രസക്തമായ ഗവേഷണ വിഷയമാണെന്ന് ദാറുൽഹുദാ വൈസ് ചാൻസലർ ഡോ. ബഹാഉദ്ദീൻ മുഹമ്മദ് നദ്‌വി. ദാറുൽഹുദാ ഇസ്‌ലാമിക സർവകലാശാല നാൽപതാം വാർഷിക റൂബി ജൂബിലിയോട് അനുബന്ധിച്ച് കൈറോയിലെ ലീഗ് ഓഫ് യൂനിവേഴ്സിറ്റീസ്, കാലിക്കറ്റ് സർവകലാശാല എന്നിവരുമായി സഹകരിച്ച് സംഘടിപ്പിച്ച 'ഇന്തോ-അറബ് റിലേഷൻസ്' അന്താരാഷ്ട്ര കോൺഫറൻസിൽ പ്രമേയ പ്രഭാഷണം നടത്തുകയായിരുന്നു അദ്ദേഹം.
ഇന്ത്യൻ മഹാസമുദ്ര തീരങ്ങളിലൂടെയുള്ള അറേബ്യൻ സഞ്ചാരവും സാംസ്കാരിക വിനിമയങ്ങളും ആഗോള ശ്രദ്ധയാകർഷിക്കുന്ന പഠനങ്ങളാണെന്നും അന്താരാഷ്ട്ര തലത്തിൽ പ്രശസ്തമായ പല സർവകലാശാലകളും അത്തരം പഠനങ്ങൾക്ക് വലിയ പ്രാധാന്യം കൽപിക്കുന്നുണ്ടെന്നും അദ്ദേഹം പറഞ്ഞു. ഇന്ത്യൻ മഹാസമുദ്രങ്ങളിലൂടെയുള്ള ശാഫിഈ മദ്ഹബിൻ്റെ സഞ്ചാരങ്ങളെ അടിസ്ഥാനമാക്കിയുള്ള ഡോ. മഹ്മൂദ് ഹുദവിയുടെ പഠനം പ്രശസ്തമായ ഇൻഫോസിസ് പുരസ്കാരത്തിന് അർഹമായതും കേരളത്തിലെ പള്ളികളുടെ വാസ്തുവിദ്യകളെ കുറിച്ചും അറബി - മലയാള ഗവേഷണത്തിൻ്റെ സമകാലിക പ്രസക്തിയും അക്കാദമിക മേഖലയിൽ ഈ ബന്ധത്തിൻ്റെ പ്രാധാന്യം വ്യക്തമാക്കുന്നുണ്ടെന്നും അദ്ദേഹം കൂട്ടിച്ചേർത്തു.